20 наурызда Түркияның Анталья қаласында спорттық гимнастикадан әлем кубогының кезекті кезеңі басталады. Бұл жарысқа қазақстандық Нариман Құрбанов та қатысады. Ол 2024 жылғы Олимпиада ойындарында күміс медаль жеңіп алғаннан кейін халықаралық жарыстарға қатыспаған еді. Толығырақ ақпарат Olympic.kz материалында.
Германияның Котбус және Әзірбайжанның Баку қалаларында өткен алғашқы екі кезеңді атақты қазақстандық гимнаст жіберіп алды. Ол Чехияда жаттығып, жаңа маусымдағы алғашқы жарысына дайындалды. Нариман бұл додада жаңа жарыс бағдарламасын көрсетуді жоспарлап отыр.
Ол оқу-жаттығу жиынын Зейнолла Ыдырысовпен бірге өткізді. Зейнолла жақында ғана өткен Әлем кубогының кезеңінде қола медаль жеңіп алған болатын.
«Нариман мен Зейнолла Прага (Чехия) қаласындағы гимнастика орталығында жеке жоспарлар бойынша дайындалып жатыр. Құрбанов әлі толық қалпына келген жоқ. Ол Антальяда өтетін Әлем кубогының үшінші кезеңіне жаңа бағдарламасын дайындауда. Ол ұлттық құрама сапында, бірақ жарысқа наурыз айынан бастап қатысады. Біз оның сол уақытқа дейін қажетті спорттық деңгейге жетеді деп жоспарлап отырмыз», – деген еді бас бапкер Александр Ким маусым алдында.
Нариманның спорттық бабына қайта оралуы көпшілік назарын аударып отыр. Қызығы, Халықаралық гимнастика федерациясы оны Әлем кубогының басты жұлдыздарының қатарына қосып, гимнастикалық ат снарядындағы басты фавориттердің бірі ретінде атап өтті.
Оның негізгі қарсыластарының бірі – 2024 жылғы Олимпиада ойындарының үш дүркін жүлдегері, Қытай спортшысы Чжан Бохэн. Ол да Олимпиададан кейін ешқандай жарысқа қатыспаған. Түркияда бапкерлер штабы 25 жастағы Бохэнді гимнастикалық ат және шығыршықта өнер көрсетеді деп мәлімдеді.
Сондай-ақ, турнирде әлем чемпионатының екі дүркін жүлдегері Ахмад Абу әл-Сауд (Иордания) да медаль үшін бақ сынайды. Бұдан бөлек, Бакудегі нәтижесін жақсартуға тырысатын Зейнолла Ыдырысов та өнер көрсетеді. Жалпы, бірінші орынға талас тартысты өтетіні сөзсіз.
Нариман Құрбанов басқа гимнастар секілді өзінің жарыс бағдарламасын жаңартты. Бұған дейін оның жаттығу бағдарламасы ең қиындарының бірі саналатын. Енді ол оны одан әрі күрделендіре түскені анық. Біршама үзілістен кейін Нариман Құрбановтың деңгейі қызық болғалы тұр.
Іріктеу кезеңі 20-21 наурыз аралығында өтеді. Ал финалдық бәсекелер 22 наурызға жоспарланған.
Нариман мен Зейнолладан бөлек, Қазақстан құрамасының бапкерлер штабы келесі спортшыларды тізімге қосқан:
- Асан Сәлімов (еркін жаттығу, тірекпен секіру, кермедегі жаттығулар);
- Роман Маменов (еркін жаттығу, шығыршық және қоссырықтағы жаттығулар, тірекпен секіру).
Айта кетейік, Қазақстан құрамасы Бакуде өткен соңғы Әлем кубогының кезеңінде, үш медаль жеңіп алған болатын.