Пирмаммад Алиев – батуттағы гимнастикадан Қазақстандағы танымал спортшылардың бірі. Ол 2016 жылы Рио Олимпиадасына қатысып, Әлем кубогы кезеңдерінің, Азия ойындарының жеңімпазы әрі жүлдегері атанған.
Алиев өткен жылы соңғы рет Әлем кубогының кезеңінде жүлдегерлер қатарына енді. Алайда биылғы маусымда ол ұлттық құрамадан тыс қалды. Себебі спортшы мансабын уақытша тоқтату туралы шешім қабылдаған.
– Пирмаммад, сізді турнирлерде немесе ұлттық құраманың оқу-жаттығу жиындарында көрмейміз. Бұған не себеп?
– Қазіргі уақытта мен жарыстарға да, оқу-жаттығу жиындарына да қатысып жүрген жоқпын. Себебі мен мансабымды уақытша тоқтатып, Шымкентте аға жаттықтырушы ретінде жұмыс істеуге ден қойдым. Кейде алға жылжу үшін, әрі қарай не маңызды екенін түсіну үшін кідіріс жасау қажет.
– Бұл шешімге қашан келдіңіз? Қаншалықты қиын болды?
– Бұл оңай шешім болған жоқ. Мен ұзақ ойландым. Бір сәтте маған үзіліс қажет екенін түсіндім. Өйткені физикалық және рухани тұрғыда демалып, қайта саралау керек болды. Бірақ бұл спорттан біржолата кету дегенді білдірмейді, тек уақытша шешім.
– Сонымен қазір толықтай бапкерлікке ден қойдыңыз ба?
– Иә, мен жаттықтырушылық бағытта дамуды жоспарлап отырмын. Әрдайым жастарды оқытып, өз тәжірибеммен бөлісуге қызығушылық таныттым. Енді осыны іске асыратын кез келді. Қазіргі таңда командалық жұмыстың түрлі әдістерін зерттеп жатырмын. Жақын арада бұл тәжірибемді жас спортшылармен бөлісіп, олармен бірге жақсы нәтижелерге жетеміз деп сенемін. Мақсатымыз – Қазақстан ғана емес, әлемдік ареналарда да лайықты өнер көрсету.
– Жаттықтырушы ретінде сіз үшін қандай қағидалар маңызды?
– Мен қазір өзімнің жаттықтырушылық философиямды қалыптастыру үстіндемін. Жаттығулар барысында тек физикалық дағдыларды ғана емес, спортшылардың психологиялық тұрғыда да өз мықты жақтарын ашуына көмектескім келеді. Жаттықтырушы – тек тәлімгер ғана емес, ол спортшыны түсінетін, қолдай алатын адам болуы керек деп есептеймін.
– Ұлттық құрамадағы жігіттермен, бапкерлермен байланысып тұрасыз ба?
– Әрине. Біз әлі де жігіттермен және бапкерлік штабпен байланыстамыз. Мен мансабымды уақытша тоқтатсам да, олардың жетістіктеріне әрдайым қуанып, қолдау білдіріп отырамын. Біз пікір алмасып, тәжірибемізбен бөлісеміз. Қашан да кеңес беруге, көмектесуге дайынмын.
– Спортқа қайта оралу ойыңызда бар ма? Қандай жағдайда бұл мүмкін болмақ?
– Оралуым мүмкін. Қазір мен басқа мақсаттарға көңіл бөліп отырмын, бірақ егер қажетті ынта пайда болып, өз күшіме қайтадан сенім артсам, бұл мүмкіндікті қарастыруға дайынмын.
– Жалпы, қазіргі жағдайыңыз қалай? Жаңа рөлге бейімделу қалай өтуде?
– Бейімделу біртіндеп жүріп жатыр. Әрине, оңай емес, бірақ өмір өз жолымен ағады. Қазір мен өз тәжірибемді жаңа рөлімде қолдануға тырысып жатырмын. Сондай-ақ жұмыстан, адамдармен қарым-қатынастан, жаңа мүмкіндіктерден ләззат алуға ұмтылудамын.